Bashkimi Evropian momentalisht e ka lënë anash përpjekjen e fuqishme për ta zgjidhur problemin Kosovë-Serbi dhe promovimin e reformave evropiane në Ballkanin Perëndimor.

Sidoqoftë, BE-ja vazhdon të ketë një qëllim strategjik të sigurisë, stabilitetit politik dhe zonës ekonomike.

Bashkimi Evropian aktualisht është i zënë më çështjet e Brexitit, zgjedhjet në Parlamentin Evropian dhe formimin e institucioneve të ardhshme të BE-së.

Përfaqësuesja e Lartë, Federica Mogherini së fundi theksoi se është mirë që edhe fuqitë e mëdha botërore të ndihmojnë në zgjidhjen e ‘nyjës gordiane’ të çështjes së Kosovës.

Agjencia e lajmeve ‘Beta’, thotë se administrata amerikane ndryshe nga BE është përfshirë dukshëm në zgjidhjen dhe marrëveshjen e rëndësishme për përmirësimin e marrëdhënieve midis Beogradit dhe Prishtinës, pasi qeveria në Uashington beson se zgjidhja e këtij problemi është historike, transmeton lajmi.net.

Megjithatë, siç shpjegojnë burimet diplomatike evropiane për agjencinë e njëjtë, BE nuk ka ikur kurrë nga Ballkani Perëndimor dhe kjo dëshmohet nga përpjekjet e qarta të Berlinit për të rinovuar dialogun Beograd-Prishtinë. Mirëpo, për zgjidhjen e kësaj çështje ka qëndrime të ndryshme në BE.

Në takimin e Ministrave të Punëve të Jashtme të BE-së u tha se anëtarët dhe institucionet e bashkimit duhet të jenë veçanërisht dhe urgjentisht të brengosura me zhvillimet në BE.

Theksojmë se nga takimi i fundit i G7 u tha se pa normalizimin e marrëdhënieve në mes Beogradit dhe Prishtinës me ndërmjetësimin e BE-së nuk mund të ketë paqe të qëndrueshme në rajon.